ஆய்வு
*தொடர் மழை காரணமாக நிறைந்துவரும் சென்னம்பட்டி அணைக்கட்டு - வலது கால்வாயை ஆய்வு செய்த அமைச்சர் தங்கம் தென்னரசு*
விருதுநகர் மாவட்டம் திருச்சுழி தொகுதி, காரியாபட்டி ஒன்றிய விவசாயிகளின் தண்ணீர்த் தேவையைப் பூர்த்தி செய்வதற்காக சென்னம்பட்டி அணைக்கட்டு வலது கால்வாய் புனரமைக்கும் பணிகளை மேற்கொள்ள வேண்டும் என்ற கோரிக்கை நெடுங்காலமாக இப்பகுதி மக்களிடையே இருந்துவந்தது.
வறண்ட நிலமான கரிசல் பூமியில் விவசாயம் மற்றும் விவசாய மக்களின் வாழ்வாதார முன்னேற்றத்தைக் கருத்தில் கொண்டு சென்னம்பட்டி அணைக்கட்டு - வலது கால்வாய் புனரமைப்பது குறித்த கோரிக்கையை திருச்சுழி சட்டமன்ற உறுப்பினரும், அமைச்சருமான தங்கம் தென்னரசு சட்டமன்றத்தில் முன்வைத்தார்.
இந்நிலையில் அமைச்சரின் கோரிக்கையை ஏற்று தமிழ்நாடு முதலமைச்சர் மு.க.ஸ்டாலின் நீர்வளத் துறை மானியக் கோரிக்கையில் இருந்து சென்னம்பட்டி அணைக்கட்டு வலது கால்வாய் புனரமைப்பு பணிகளுக்காக ரூ. 15 கோடி ஒதுக்கீடு செய்தார். நீர்வளத்துறை வாயிலாகப் புனரமைப்புப் பணிகள் துரிதமாக மேற்கொள்ளப்பட்டதன் மூலம் சென்னம்பட்டி கால்வாயில் நிரந்தரமாக நீர் பெற வழிவகை செய்தது.
இதனிடையே புனரமைக்கப்பட்ட சென்னம்பட்டி அணைக்கட்டு வலது கால்வாயில் இரு மாதங்களுக்கு முன்பு திறக்கப்பட்ட நீர் பெருக்கெடுத்து ஓடியதை விவசாய மக்களோடு சேர்ந்து அமைச்சரும் வரவேற்று மகிழ்ந்தார். இந்நிலையில் கடந்த இரண்டு நாட்களாக பெய்து வரும் கனமழையின் காரணமாக நீர்வரத்து அதிகரித்துள்ளதால், நந்திக்குண்டு பகுதியில் உள்ள சென்னம்பட்டி கால்வாயின் ஒரு பகுதியில் நேற்று இரவு உடைப்பு ஏற்பட்டது.
இதையறிந்த அமைச்சர் உடைப்பினை நேரில் ஆய்வு செய்தார். தொடர்ந்து, துரைசார் அதிகாரிகளிடம் விரைந்து மறுசீரமைப்பு பணிகளை மேற்கொள்ளும்படி உத்தரவிட்டார். மேலும் இந்தக் கால்வாயில் தடையின்றி நீர் வருவதை உறுதி செய்யும்வகையில் புதிய பணிகளை மேற்கொள்ள தமிழ்நாடு முதலமைச்சர் மு.க.ஸ்டாலின் ரூ. 10 கோடி கூடுதல் நிதியினை ஒதுக்கீடு செய்துள்ளார் என்பது குறிப்பிடத்தக்கது. இந்த ஆய்வின் போது, நீர்வளத் துறையின் குண்டாறு படுகை பிரிவு செயற் பொறியாளர் நிறைமதி, உதவி செயற்பொறியாளர் முத்துச்சாமி உள்ளிட்ட துறைசார் அலுவலர்களும், உள்ளாட்சி அமைப்புகளின் பிரதிநிதிகளும் உடனிருந்தனர்.
Comments
Post a Comment